Azərbaycan kanoeçiləri Sergey Bezuqlıy və Maksim Prokopenko Polşanın Poznan şəhərində davam edən dünya çempionatında daha bir məsafəyə yürüşdə finala çıxıblar. 2 nəfərlik qayıqda (C-2) çıxış edən Bezuqlıy – Prokopenko dueti 500 metr məsafəyə seçmə mərhələ yürüşündə də rəqib tanımayıb.

Startdaca liderliyə yiyələnən kanoeçi cütlüyümüzlə bir müddət Alexandru Dumitresku – Viktor Mixalaki (Rumıniya) dueti birincilik uğrunda rəqabət aparıb. Lakin rumıniyalı rəqiblərini də 6,68 saniyə geridə qoyan təmsilçilərimiz finişə 1 dəqiqə 41 saniyə 423 mikrosaniyəyə çatıblar.

Bununla da seçmə mərhələ yürüşündə 1-ci yeri tutan Bezuqlıy –Prokopenko cütlüyü bu gün Bakı vaxtı ilə saat 18:15 və 18:20-də keçiriləcək yarımfinal yürüşlərində iştirak etmədən birbaşa əsas finala vəsiqə qazanıblar. 500 metr məsafəyə həlledici yürüş avqustun 22-də Bakı vaxtı ilə saat 14:14-də baş tutacaq.

Qeyd edək ki, Sergey Bezuqlıy – Maksim Prokopenko avqustun 19-da 1000 metr məsafəyə seçmə yürüşü də 1-ci pillədə tamamlayaraq, birbaşa əsas finala çıxıb. Bu məsafəyə final yürüşü avqustun 21-də Bakı vaxtı ilə saat 14:10-da olacaq. Həmin gün Bezuqlıy – Prokopenko cütlüyü 200 metr məsafəyə seçmə və yarımfinal yürüşlərində də çıxış edəcək.

Texniki nəticələr
Kayak və kanoe qayıqlarında avarçəkmə üzrə dünya çempionatı
2 nəfərlik kanoe qayığı (C-2)
Məsafə: 500 metr
Seçmə mərhələ

1. Sergey Bezuqlıy – Maksim Prokopenko (AZƏRBAYCAN) – 1:41.423
2. Alexandru Dumitresku – Viktor Mixalaki (Rumıniya) – 1:48.103
3. Qabor Seleş – David Varqa (Macarıstan) – 1:49.387
4. Boqomil İvanov – Georgi Velinov (Bolqarıstan) – 1:50.495
5. Ferents Seksardi – Sebastian Marçak (Avstraliya) – 1:51.735
6. Knaq Do Hyunq – Kim Seon Ho (Cənubi Koreya) – 1:52.711
7. Endryu Alerio Viktor – Fortunato Pakavira (Anqola) – 2:19.651

Dünya çempionatının rəsmi saytı: kayak2010.com