Qadın güləşi üzrə yığma komandamız qarşıdan gələn dünya çempionatına hazırlıq məqsədilə təlim-məşq toplanışını Belarusiyanın Minsk şəhərində davam etdirəcək. Bu məqsədlə komandamız artıq Belarusiyaya yola düşüb. Minsk şəhərinin “Stayki” Olimpiya Mərkəzində sentyabrın 5-dək davam edəcək TMT-da Marziget Baqomedova (48 kq), Patimat Baqomedova, Anjela Doroqan (hər ikisi 51 kq), Yuliya Ratkeviç (55 kq), Sona Əhmədli (59 kq), Nadya Sementsova, Gözəl Zutova (hər ikisi 63 kq), Zümrüd Qurbanhacıyeva (67 kq), Dina İvanova (72 kq) iştirak edəcək. Yığmamız təlim-məşq toplanışını böyük məşqçi Kurban Kurbanov, məşqçilər Arif Fərmanov və Sirajuddin Eldarovun rəhbərliyi altında keçəcək.

Sərbəst və yunan-Roma güləşi üzrə yığma komandalarımız isə 6-12 sentyabr tarixlərdə Moskvada keçiriləcək dünya çempionatına hazırlığı Bakıda, müvafiq olaraq “Şüa” İdman Sağlamlıq Mərkəzi və T.Bəhramov adına Respublika stadionunun yunan-Roma güləşi zalında davam etdirirlər. Buna qədər sərbəst güləşçilərimiz Kislovodskda, yunan-Roma güləşçilərimiz isə Qusar Olimpiya İdman Kompleksində TMT keçiblər.