Azərbaycanlı avarçəkən Radoslav Kutsev Sinqapurda keçirilən Yeniyetmələrin I Yay Olimpiya Oyunlarında kanoe slalom növündə də 6-cı yeri tutub. Kutsev ilk dəfə yarışdığı kanoe slalom növündə 8 ən güclünün yer aldığı ¼ final mərhələsini adlaya bilməyib.

17 yaşlı idmançımız 4-cü mərhələyədək irəliləməyi bacarıb. O, yarımfinala vəsiqə uğrunda mübarizədə ukraynalı Anatoli Melnikə uduzub. Melnik 1 dəqiqə 48,36 saniyə, Kutsev isə 1 dəqiqə 59,31 saniyə nəticə göstərib. Bununla da 17 yaşlı idmançımız mübarizəni dayandırı6b. O, ¼ finalda uduzanlar arasında ikinci ən yaxşı nəticəni göstərib. Bu isə o deməkdir ki, Kutsev yarışı 6-cı yerdə başa vurub.

Olimpiya çempionu adını Siao Donq Vanq (Çin) qazanıb. Dennis Söter (Almaniya) gümüş, Anatoli Melnik (Ukrayna) bürünc medala sahib olub.

Qeyd edək ki, Radoslav Kutsev 21-22 avqustda kanoe növündə də çıxış edib. Kutsev ¼ finalda uduzaraq, 6-cı yeri tutub. Olimpiya çempionu adını isə onu üstələyən kubalı Kaserio Sardenas qazanıb.