Yunan-Roma güləşi üzrə Azərbaycan millisinin baş məşqçisi Fərid Mansurov yığmanın dünya çempionatında çıxışından razı qalıb. İkiqat dünya və olimpiya çempionu qazanılan 1 qızıl və 1 bürünc medaldan sonra sevincini bölüşüb: «İlk yarış günündə Vitali Rəhimova ümidlərim böyük idi. Amma o bürünc medalla kifayətləndi. Əvvəlcədən demişdim ki, qızıl medalımız olmalıdı. Bu mənada Həsən Əliyevin qələbəsinə çox sevindik. Cari il onun üçün çox uğurlu oldu. Həm Avropa çempionu oldu, həm də dünya».
Komandamıza ilk qızıl medalı qazandıran yunan-Roma güləşi üzrə dünya çempionu Həsən Əliyev (60 kq) Moskvadakı qələbəsi barədə öz fikirlərini bölüşüb. “Mən gərginlik hiss edirdim, axı bu, dünya çempionatıdır. Burda bütün güclü güləşçilər iştirak edir. Əsas rəqiblər isə Asiya qitəsindəndir. Çox çətin oldu. Görüşlərdən final və ¼ finaldakı görüşümü qeyd edə bilərəm. Belə alındı ki, baş məşqçimiz Fərid Mansurova dünya çempionatında ilk “qızılı” mən verdim. İnşallah, ona ilk olimpiya “qızılı”nı da mən verərəm”.